Ko te mapu roa mōteatea: Kai hea rā he whare mōteatea mō ngā mātauranga waiata Tūhoe? Ko te mahi a tēnei tutohinga whakapae he whakautu i te urupounamu e mapu roa mōteatea nei i tōku ngākau, ara kai hea rā he whare mōteatea mō ngā mātauranga waiata o tōku iwi? Inā hoki e whakapae ana ko tā te mōteatea he pupuri i te toi o te kupu, ko te tiketiketanga o te reo taketake Tūhoe. Kai te toi o te hiwi whakaaro ko te ahu pēhea o tō tātau reo, otirā o wā tātau taonga katoa, tē tāea e tātau te matakitehia, nō reira kai te kapu o wō tātau ringaringa te mahi nui ki te whakataka rautaki pae oranui mō tō tātau reo tuatahi, tuarua mō wā tātau mōteatea e ora ai tēnei whare kōrero nui o Tūhoe. Ka waihangatia he tauira o te whare mōteatea whare pupuri i ngā mātauranga waiata Tūhoe, he aha tēnei momo whare? He whare wānanga i a kura tawhito, he pakitara whakairinga kōrero mō kura hōu, he kura whare, he kura marae mō Ngāi Tūhoe tāukiuki. Kai ā kurumatarerehu mā, te tino tauira o te reo o te kaitito hai whakairi ki ngā pakitara o te whare hai kete mātauranga mā torekaihuruhuru mā kai te whatitoka o te whare. Ko rātau te hunga o te ao wairua kia rātau, hoki mai ana kia tātau e takatū nei, kia tūtaki atu ki ngā kura kaitito mōteatea o mohoa noa nei, ko te tira hou tēnei e takahi nei i ngā tapuwae o rātau mā, e titoa ana i ngā kōrero o te wā hai mōteatea mō te āpōpō. Ko au ko Te Urewera ko Te Urewera ko au: Kai ō tātau mōteatea e whakaata mai ana ko te wairua o te pepeha nei, ‘he wairua tipua a Te Urewera, nōna anō ia, ā, he uri atawhai ōna’. Mātua e noho pōhara tangata ana ō tātau mārua, whārua o Te Urewera, nō konei ka uaua ai te mahi a te kaitito mōteatea e whai ana i te tauira o uki, nā reira tukuna mā te tito mōteatea ōna uri e whakahoki mai ki tōna ūkaipō, ki ōna pae maunga kia purea ia e ngā hau o Tāwhirimātea. Kai konei anō te urupounamu e rewa ake ana i te pae mō ngā huarahi e taea ai e Ngāi Tūhoe, karangahia he huihuinga nui, whakaminea mai te iwi: Ko te hui ahurei ā Tūhoe te hui whakahirahira katoa, kua tata eke ki te rima tekau tau a Tūhoe e ū ana ki tōna hui ā-iwi, ā, e kaha mau nei i tēnei wā, kō tā ngā rangahau nei he whakatuwhera i te whare ahurea o te iwi, ko tōna hītoria, ko ōna kura huna. Ka urupounamu anō he aha tā tēnei hui nui ki te whakatairanga i ngā āhuatanga hāpai i tōna reo, i ōna tikanga marae. He aha kai te pae tawhiti mō tēnei hui nui? He hanga whare te tangata, he hanga tangata te whare, ka tūhono atu te whare ahurea ki ngā whare hou kua hangaia hai whare kahikatoa mō Tūhoe inamata, Tūhoe anamata. Hai kōrero whakamutunga, e whakapono ana mā te whakatū whare mōteatea ka ora ai ngā mātauranga waiata Tūhoe. Rōpoipoihia te hunga kaitito e tipu ai, e whanake ai te reo o te kaitito e ora ai te whare, kia rongohia ai te tiketike mōteatea ki te wao nui o Te Urewera haere ake nei.
Available Now
|
The LatestHere you can find a list of our recently completed audiobook productions. Archives
May 2025
Categories |
RSS Feed